ანტიგონე
ყველამ დამარხოს ყველას მკვდარი მებაღევ, გესმის? ბრინჯს, სიმინდს, ხორბალს – შენი ცოლის ფხვიერი ტანი, მკვდარ ლეკვს – ფეხსაცმლის ძველი ყუთი წყალს – ცხელი პეშვი ნაყოფს, ხის ძირას ჩამოცვენილს - კალთის შეშვერა. ყველამ დამარხოს ყველას მკვდარი, მეთევზევ, გესმის? ზღვაში დათესე ყველა თევზი, რაც ბადეს მოჰყვა, მტვერს ამრავლებენ ნივთები და დამტვერვა ნივთებს, ხოლო სიყვარულს – შენი ხელის მხარზე დამყნობა. ყველამ დამარხოს ყველას მკვდარი, დიანა, გესმის? ყველა ნაგავი დაიბრუნე, რაც გადაყარე, თაროზე მტვერი, მაგიდაზე ხახვის ნაფცქვენი ყველი და პურიც გაამზადე – თაგვის სამხარი. ყველამ დამარხოს ყველა მკვდარი მერე მაჩვენოს - გვამი თესლივით თუ ღვივდება წყალში დამბალი. მარცხენა ხელი ჩემი ძმაა ძმაა მარჯვენაც, მარჯვენა მკვდრად და მარცხენა კი ცოცხლად დავფალი. ყველამ დამარხოს ყველას მკვდარი, ყველამ დამმარხეთ.
© POETRY.GE 2013 - 2024
@ კონტაქტი
0 კომენტარი