პირადი ფასეულობები

ყველას ჰგონია პატარა არფა -
ისე გაიზარდა ჩემი სავარცხელი;
მაგიდასაც - ტილოს მაგიერ -
თითქოს აფრა აფარია, -
არ მემეტება პურის საჭრელად;

ლამისაა ქოთნებიდან გადმოცვივდნენ -
ყვავილები ვერ ხედავენ რას ვხატავ,
რას ვწერ. მზის კვერცხი სარკმელს
დავახალე, გავაცხელე ტაფად -
ნახევარი საუზმე მზად გვაქვს.

ღრუბელს კათხა შევუშვირე,
ბროლის ჭიქაში ჩაეტია.
ძირს - მტვერია თუ მარგალიტები? -
ბურთულებზე ფეხი მისხლტება.
არ გადავფერთხავ. გადავფერთხავ:

ყავისფერ ქუდებს, ქოლგებს
უქუდო და უქოლგო ყავისფერსაც -
ხალიჩიდან წვიმა ჩაიტანს. მე შემოვალ
და ყველაფერს კარგად აგიხსნი:
ეს არ არის ჩიბუხი, და არც მაგრიტი.