28-ა, ნავარის დედოფალი,წვიმა

და წვიმს, ვიღაც აირავქნავს ხელებს
კვამლიანი ღიმილების ღეჭვით
და წვიმს, თეთრი კუბოების მერე
მოლოდინში შეპარულა ეჭვი

და წვიმს, როგორც გადათვლილი ფული,
მამის საფლავს იფიცება ბობი
და წვიმს, ღმერთი-ჩახველება-რჯული,
კალვადოსი, ვაისროი, ტოგა

და წვიმს, ჟანგი მოსდებია ჟარგონს,
უცნაური მჟვრიალია ბაკლის
და წვიმს, ლანდობს დედოფალი მარგო,
გაღიმება - იდუმალი ნაკლი

და წვიმს, ვიღაც აზარტულად იწყებს,
ვზივარ კვამლში და არაფერს ვცდილობ
და წვიმს, როგორც გუშინდელი სიცხე,
ზედ აკვდება ამ უცნაურ ტილოს.