ბაღი
ბაღი. ჩვეული ნაცნობი სახეები, ცივი, გაყინული არე-მარე. მე და ის. სკამზე ორნი. საღამოს სუსხიანი ნიავი და ორი წითლად მოელვარე სიგარეტის ღერი. ირგვლივ უკუნითი სიჩუმე, თითქოს სამყარო წყვეტს არსებობას, ყველაფერი დროსთან ერთად შეშდება. ვარღვევ სიჩუმეს - მიყვარხარ! მიყურებს და მიღიმის. - ჩამეხუტე და ისე მჭიდროდ მეკრობა რომ გულს მოძრაობა უჭირს. მეორე დღე. იგივე. წითლად შეღებილი სკამი. ამჯერად საუბარს ის იწყებს - მომიკიდე... ხვალ მივდივარ. - აქამდე რატომ არ ვიცოდი? დუმს. - კი მაგრამ... მე? - შენ ჩემი პატარა ბიჭი ხარ. - რამდენი ხნით მტოვებ? კვლავ დუმილი. - მიყვარხარ! და როგორც ყოველთვის, საოცრად მიღიმის. ..................... - შენ? - გამარჯობა... - რატომ არ შემეხმიანე? ძალიან ვნერვიულობდი, რა აღარ ვიფიქრე. - ვისვენებდი. ჩემი ხმა ცას სწვდება, ის... ის კი მშვიდად ზის და ჩანთაში სანთებელას ეძებს... ჩემი დიდიხნის საუბრისა და მისი გაყინული მზერის შემდეგ - მიყვარხარ! მიყურებს და აღარ მიღიმის. ........................ ისევ ბაღი, ჩვეული სახეები, ნაცნობი გარემო, სკამი. სკამზე ერთი წითლად მოელვარე სიგარეტის ღერი. 2017
© POETRY.GE 2013 - 2024
@ კონტაქტი
0 კომენტარი