ახლა მე ვეძებ...

ახლა მე ვეძებ ყველაფერ მართალს
და ხელებს მხოლოდ სიმართლეს ვუწვდი.
ახლა მდუმარედ ვაცილებ ზამთარს,
ახლა მდუმარედ გაზაფხულს ვუცდი.
ჩემი სულიდან ამოდის ალი
გაუხუნარი სხივების თრთოლით.
დგას თებერვალი ელამი თვალით
სივრცეს ეცემა ნამსხვრევი ბროლის.
შორია სითბო, სიცივეც შორი,
სამყაროს გულში კრთება უარიც.
ცისკენ მიიწევს სულის მზე ქროლვით,
ნისლში მიცურავს გზა მიუვალი.
ახლა მე ვეძებ ყველაფერ მართალს
და ხელებს მხოლოდ სიმართლეს ვუწვდი.
ახლა მდუმარედ ვაცილებ ზამთარს,
ახლა მდუმარედ გაზაფხულს ვუცდი