გაზაფხულის ბგერები

გაზაფხულის ბგერები

როს თებერვლის სიფერმკრთალით დაღლილმა,
დედამიწამ შემოიხსნა ღილები,
დაიღვარა, გაზაფხულად გაწვიმდა
და სხეული მოიქარგა იებით;
ამოისხა ღიმილებად კვირტები,
გადაშალა სიყვარულის ჩითები,
მოიხადა ნისლიანი მანდილი
და მკლავები შეიმოსა შიშველი;
მადლიანად ააჟღერა ჩიტები,
და ჭიკჭიკი მათი ლექსად გარითმა,
სინატიფით გაჟღენტილი ჰანგები,
გაზაფხულის სიმფონიად გაისმა.
გულს ახარებს ღიმილები ყვავილთა,
თვალს იტაცებს საოცარი ფერები,
დედამიწამ სიფერმკრთალით დაღლილმა
ააჟღერა გაზაფხულის ბგერები!

დიანა ამბოკაძე