ეს გარდასახვა

რა შეიცვალა არ ვიცი, მაგრამ 
ეს გარდასახვა მზარავდა უკვე.
ცივი სალამი მომიგდო ქარმა,
მე კი მეგონა,მიცნობდა უკეთ.
ნაფეხურები იმ თბილი წლების,
დრომ უკითხავად გააქრო სადღაც...
ის მეგობარი- სანდო და წრფელი 
არ მომეჩვენა გულწრფელი ახლა ;
ვიხეტიალე ქუჩაში ქართან ,
ურთიერთობა იცვლიდა ნიღბებს.
გაუბრალოვდა ძვირფასი რაღაც,
შევეხე ყოფის გაყინულ ლინზებს
და მზე ათბობდა სამყაროს , თუმცა,
სულს არ ათბობდა ნათელი სხივი.
ვერ აღფრთოვანდა იმ ორით თუთა,
რადგან სხვაგვარი ახსოვდა წყვილი.
რა შეიცვალა,ვერ ავხსნი, მაგრამ
დრომ გაზაფხულის დაკარგა კვალი,
ცივი სალამი მომიგდო ქარმა.
და სიყვარულის დაიდო ბრალი!