ეს ყველაფერი რომ განმეორდეს ..

ეს ყველაფერი რომ განმეორდეს, 
ამ წუთისოფელს წამით გავცდები. 
ეს სიცოცხლე რომ კვლავ განმეორდეს 
მაინც დამრჩება რაღაც სათქმელი.

ცას თუ ვარსკვლავი ისევ მოსწყდება 
გავიზიარებ ყოფნა-არყოფნას, 
ალბათ ტკივილიც განმეორდება 
რადგან კუთხეში ტირის ბავშვობა.

არის წარსულში რაღაც ფარული, 
რაღაც ისეთი თავს რომ მაცოდებს 
და თუ დაბრუნდა ეს გაზაფხული, 
იმ დამჭკნარ იებს კვლავ გავაცოცხლებ.

ვერ გაგიმეტებ მარტოობისთვის . 
სიცოცხლეს სულ სხვა თვალით შევხედავ,
და თუ მეღირსა მოსვლა ისევე, 
განმეორდება ჩვენი შეხვედრა.

ვიცი, რთულია ყველა ლოდინი, 
ერთფეროვნებაც თავს მომაბეზრებს. 
ვერ შევძლებ ყოფნას ანგელოზივით, 
აქ ხომ რთულია ცოდვებს გაექცე;

მაგრამ ვერ დამღლის წუთი მედროვე, 
სულ არ მადარდებს ჟამის მისნობა. 
მე ამ სიყვარულს გავიმეორებ 
თუნდაც დამცინოს მარადისობამ.