ნუ ჰკლავთ ერთმანეთს

ნუ ჰკლავთ ერთმანეთს, ბიჭებო,
როდესაც ასე ცოტა ვართ.
დაუბადებელ შვილებთან
ცოდვილები და ცოდვა ვართ.

ნუ ჰკლავთ ერთმანეთს, ბიჭებო,
ისევ ვლუღლუღებ ამ დილით.
ვერც სიტყვა ვერ შეგაშველეთ,
ვერც გაგაშველეთ მანდილით.

ერთმანეთს ნუ ჰკლავთ, ბიჭებო,
ერთ ბეწო საქართველოში!
სიძულვილს აფრქვევთ, სიყვარულს —რატომღაც სადღეგრძელოში.

გადაგვიარენ, შეგვჭამენ
სხვათა ჯიში და ტომები.
თუკი სიმრავლით დაგვჯაბნეს,
არც დასჭირდებათ ომები.

ნუ ჰკლავთ ერთმანეთს,ბიჭებო,
როდესაც ასე ცოტა ვართ.
დაუბადებელ შვილებთან
ყველა ქართველი ცოდვა ვართ.