წმიდაო გიორგი

წმიდაო გიორგი, მფარველო უტკბესო,
სამშობლოს გავედრი, ცოდვილი ქართველი;
ცხოვრება დაგვიდგა უღმრთო და უწესო,
სიკეთე არ დაგვრჩა თითებზე სათვლელი;

რწმენით და იმედით ათასჯერ დაცული,
ხელიდან გვეცლება ედემი პატარა;
წმინდანო უმზესო, გვიკვდება მამული,
უფალი ტირის და ხარხარებს სატანა;

შენა ხარ მარადის იმედი ქართველთა,
მხსნელი და მეოხი, წმინდანი მფარველი;
რწმენით მიგვიყვანე კვლავ უფლის კარებთან!
ამას გთხოვ, მეც ერთი ცოდვილი ქართველი;

მჯერა, რომ მიუზღავ ბოროტსაც საკადრისს,
ვერ გაგვწყვეტს სატანა, უფალის სუფევსო!
შენს სახელს ვადიდებთ კვლავ, აწ და მარადის,
წმიდაო გიორგი, მფარველო უტკბესო.