მკურნალი(თანამედროვე ზღაპარი)

იყო და არა იყო რა, ღვთის უკეთესი რა იქნებოდა?
არც არაფერი ყოფილა და არც არა იქნება რა არასოდეს.

ერთხელ, ერთი "მორწმუნე" უფლის ხატის წინ იდგა და ფიქრობდა:
-უფალო, ნეტავ რატომაა, რომ ამდენი უსამართლობა ხდება ქვეყანაზე?  შენ ხომ ყველა გიყვარს, განა ამდენი სნეული, ხეიბარი და გაწამებული ხალხის ყურება შენს გულს ახარებს?  შენ ხომ ყველა მათგანის განკურნება შეგიძლია, ხომ შეგიძლია ყველა მოტირალს მოსწმინდო ცრემლი?...
ასეთ ფიქრებში იყო და უცებ ხედავს, საოცრად განათდა არემარე. ისე განათდა, რომ წამით თვალი და გონება დაუბნელა. მერე კი ულამაზესი არსება დაინახა, რომელიც ჰაერში ელავდა და თავზე დასქეროდა. მიხვდა, უფლის ანგელოზი იყო. მუხლებზე დაეცა და სინანულმა შეიპყრო.
-განმეშორე ანგელოზო, არ ვარ მე შენი ხილვის ღირსი, ეშმაკი შემიჯდა და ეჭვებში ჩამაგდო. დიდად შევცოდე და ღვთის სიყვარულში ეჭვი შემეპარა. უგუნური და უღირსი ვარ და არ ვიმსახურებ შენს ხილვას.
ანგელოზმა ოდნავ გაიღიმა და მიმართა:
-შენ არც პირველი ხარ და არც უკანასკნელი, ვინც ასე ფიქრობს, ოღონდ ეს ეშმაკის ბრალი კი არა, შენი მცირედმორწმუნეობის ბრალია. უფლის უსაზღვრო სიყვარულის და მოწყალების ნიშნად სნეულთა განკურნების ნიჭი გეძლევა, ოღონდ ყველა საავადმყოფო და სნეულთა ადგილსამყოფელნი უნდა დაიარო და უკლებლივ ყველა განკურნო.  
როდესაც ამას გააკეთებ, მოგეტევება ის ცოდვა, რაც შენი უგუნურებით შესცოდე. ამისთვის გარკვეული დრო გეძლევა, რის შემდეგაც კვლავ გამოგეცხადები და უფლის ნებას გამოგიცხადებ. ოღონდ ერთი აუცილებელი პირობა უნდა შეასრულო - ყოველი სნეული მამის, ძის და სულიწმიდის სახელით უნდა განკურნო და უთხრა, რომ თუ ჭეშმარიტ სარწმუნოებას არ მიიღებენ და ჭეშმარიტი ქრისტიანული ცხოვრებით არ დაიწყებენ ცხოვრებას, უკან შებრუნდებიან და სნეულებანიც უკან დაუბრუნდებათ. გასწი ახლა და შეასრულე უფლის ბრძანება.
კარგა ხანს გაოგნებული იდგა, ვერ გაეგო, ეს სიზმარი იყო თუ ცხადი. როცა გამოერკვა, პირველ რიგში, ღვთის ტაძარში გაიქცა და მოძღვარს მოუყვა ყველაფერი, რაც ნახა და მოისმინა. მოძღვარმა ყურადღებით მოუსმინა, შემდეგ დიდხანს იფიქრა და უთხრა:
თუ ეს ნამდვილად ღვთის ანგელოზი იყო, და ეტყობა, რომ ეს ასეა, წავიდეთ უახლოეს საავადმყოფოში და ვსინჯოთ. ეშმაკი ვერ განკურნავს ვერავის და მით უმეტეს, ყოვლადწმინდა სამების სახელით. თუ ეს მართალია, მალევე გამოჩნდება.
ასეც მოიქცნენ. უახლოესი საავადმყოფოსკენ გაემართნენ. პირველივე ავადმყოფთან მივიდნენ, ვინც კი დაინახეს - თაბაშირისფეხიანი კაცი საავადმყოფოს ეზოში სკამზე იჯდა და მადიანად აბოლებდა.
ისიც კი არ იცოდა, როგორ უნდა განეკურნა. სამედიცინო თვალსაზრისით, საერთოდ არაფერი არ გაეგებოდა, მაგრამ სჯეროდა, უფლის ძალით თუ კარნახით რაღაცას მოახერხებდა. მივიდა, გამოელაპარაკა და თაბაშირიან ფეხზე ხელი დაადო.
- გტკივა?
- ახლა ცოტა არა მიშავს, თავიდან ძალიან მტკიოდა, მანქანამ დამარტყა, სამ ადგილას მაქვს გადამტვრეული. ექიმი გარეთ არ გვიშვებს, ჩუმად გამოვიპარე სიგარეტის მოსაწევად, - თქვა და გაუღიმა.
- კარგი, ახლა აღარ გეტკინება და გამოჯანმრთელდები. გჯერა?
გაეცინა: - წადი, ბიძია, გიჟი ხარ ვიღაცაო. 
-არ გეტკინება-მეთქი, -  უთხრა და ფეხზე მთელი გრძნობით და რწმენით დაადო ხელი.
-მოუსმინე, რასაც გეუბნება, - უთხრა მამაომაც.
- ერთი წუთით გაირინდა, მაგრამ მერე გაბრაზებული მოუტრიალდა და მომშორდიო, სახეში მიახალა.
აწითლებული წამოხტა. არ გამოუვიდა. არ იცოდა, რა ექნა. ცრემლები მოაწვა და მამაოს იმედგაცრუებული მიაჩერდა.
-მე ვიცი, რატომაც ვერ მოარჩინე - უთხრა მოძღვარმა - პირობა დაგავიწყდა. თუ პირობა არ შეასრულე, ვერავისაც ვერ მოარჩენო.
ისევ იმედი ჩაესახა. გადაწყვიტა, ისევ ეცადა. ეს კაცი აღარ გაიკარებდა, გასაგები იყო, სხვასთან უნდა ესინჯა. გაიხედ-გამოიხედა, ახალგაზრდა გოგო დაინახა ინვალიდის ეტლში.
მოდი, ამ გოგონაზე ვცდიო, მამაოს უთხრა და მისკენ დაიძრა.
მიუახლოვდა თუ არა, გოგონას ალერსით გაუღიმა. მანაც ღიმილით უპასუხა.
-გინდა მოგარჩინო? - უთხრა გოგონას - არ გატყუებ, მართლა მოგარჩენ.
გოგონამ გაოცებით შეხედა.
ოღონდ უნდა შემპირდე, რომ უფლის მცნებებით იცხოვრებ და ჭეშმარიტი მართლმადიდებელი იქნებიო.
-გოგონას გაეცინა და თანხმობის ნიშნად თავი დაუქნია.
დაიკუზა, გოგონას ფეხებზე ხელი დაადო და უთხრა:
სახელითა მამისათა და ძისათა და სულისა წმიდისათა განკურნებული ხარ, ადექი და გაიარეო.
გოგონამ უიმედოდ შეხედა და თვალებში ცრემლი ჩაუდგა, თითქოს ეუბნებოდა, რატომ დამცინიო.
-არ გეხუმრები, არც დაგცინი, ადექი და გაიარეო. 
გოგონა ჯერ შეცბა, მერე კვლავ გამოხედა და რადგან მის თვალებში ვერც ცბიერება და ვერც დაცინვა ვერ დაინახა, გაიფიქრა, მოდი, მართლა ვცდიო.
...და, აი, საოცრებაც. გოგონა ფეხზე გამართულად დადგა და მალე გაიარა კიდეც.
ვერ აღგიწერთ იქ რა ამბავი ატყდა. ცალკე სიხარულისგან ატირებული გოგონა ყვიროდა, ცალკე ჩვენი "მკურნალი" მოძღვართან ერთად მოზღვავებულ ხალხს ძლივს იგერიებდა. ეს პირველი იყო და იმიტომ გადმოგცემთ ასე დაწვრილებით. იმ დღეს ყველა ავადმყოფი მოინახულა და ყველა გამოაჯანმრთელა, ოღონდ ეგ იყო, გაოგნებულ ექიმებს და იქ მყოფ ხალხს ძლივს დააღწია თავი და რომ არა კარგი სირბილის უნარი, ალბათ, ვერც გამოაღწევდა. აი, მოძღვარმა კი ვერ დააღწია თავი და რაც არ უნდა გასაოცარი იყოს, პოლიციაშიც კი ამოყო თავი ახსნა-განმარტების მისაცემად და მკურნალის (მოდი დროებით ასე დავარქვათ და თქვენის ნებართვით შემდეგშიც ასე მოვიხსენიებ) ვინაობის დასადგენად .
შემდეგ უკვე ღვთის ნებით და განგებით ყველაფერს ახერხებდა. აღარ შევუდგები იმის ახსნას, რამდენი წინააღმდეგობის გადალახვა უწევდა. ცალკე პოლიცია დასდევდა, ცალკე საიდუმლო სამსახურები, ცალკე რელიგიური ჯგუფები, მაგრამ მაინც ღვთის წყალობით სასწაულად უძვრებოდა ყველას ხელიდან. ისე ჰქონდა სახელი გავარდნილი, რომ როგორც კი სადმე გამოჩნდებოდა, მაშინვე ხალხის უზარმაზარი ნაკადი ჩნდებოდა იქ მის დასაცავად. ერთხელ საიდუმლო სამსახურებმა მაინც მოახერხეს მისი დაჭერა და წაყვანა, მაგრამ ისეთი ამბავი ატყდა, ხალხი მთელ მსოფლიოში აჯანყდა და ისეთი ამბები დატრიალდა, არასოდეს რომ არ მომხდარა დედამიწის ზურგზე. მსოფლიო მასობრივი არეულობა და პროტესტი დაიწყო და არათუ გაათავისუფლეს, სახელმწიფო დაცვაც კი დაუნიშნეს და გადაადგილების უსწრაფესი საშუალებანიც პირველივე მოთხოვნისთანავე დაუქვემდებარეს.
ქვეყანა ქვეყანას ცვლიდა, სნეული - სნეულს. მის შესახებ უკვე ლამის ახალდაბადებულმა ბავშვმაც კი იცოდა და არათუ ელოდებოდნენ, ფეხდაფეხ დაყვებოდნენ სნეულნი, ვისაც როგორ შეეძლო. ისიც  
დაუღალავად ყველას კურნავდა. ისე იყო დაკავებული, რომ არც ძილის და არც ჭამის დრო არ ჰქონდა. ძალებს კი, ღვთის წყალობით, უფლისგან იღებდა.
ამ ყველაფრის გადმოცემა ძალიან რთულია, ეს ადამიანის ყოველგვარ ფანტაზიას აღემატება. ასეთის წარმოდგენა ზღაპარშიც კი ძნელია. ამიტომ,უმორჩილესად გთხოვთ, თავად წარმოიდგინოთ, როგორც შეგიძლიათ. მით უმეტეს, რომ აქ პროცესი სულაც არ არის მთავარი.
ასეა თუ ისე, დიდმა დრომ განვლო. ჩვენმა მკურნალმა დედამიწაზე ყველა სნეული განკურნა და უზომოდ ბედნიერმა და გახარებულმა დაისვენა. გასაოცარი ის იყო, რომ პირობაზე არც ერთ ადამიანს არ უთქვამს უარი, სხვა რელიგიის ფანატიკურ მიმდევრებსაც კი, იმდენად ძლიერი და გადამდები აღმოჩნდა გამოჯანმრთელების სურვილი.
როცა მისია დაასრულა, კვლავ გამოეცხადა უფლის ანგელოზი და უთხრა:
-ყველაფერი ისე შეასრულე, როგორც უფალმა დაგავალა. მისი ნებაა, თავიდან დაიარო ის ადგილები, სადაც კი მოგიწია ყოფნა და ნახო, რამდენად შეასრულეს ადამიანებმა მოცემული პირობა. რა თქმა უნდა, გარეგნობას შეგიცვლით, რომ არავინ გიცნოს. როდესაც ყველაფერს მორჩები, კვლავ მოვალ და დანარჩენსაც გეტყვიო
რაღა უნდა ექნა ჩვენს მკურნალს, უფლის ნებას ხომ ვერ გადავიდოდა? კარგად მოემზადა და დავალების შესრულებას შეუდგა.
დიდი ხნის შემდეგ, როცა ყველაფერი მოითავა, ანგელოზი კვლავ გამოეცხადა:
 -აბა, რას იტყვი?
 -დაღონებული,ცრემლიანი თვალებით მიაჩერდა ანგელოზს და უთხრა:
-შემოვიარე ანგელოზო ყველა ის ადგილი, სადაც კი სნეულნი განვკურნე. იმედი მქონდა, რომ უკან დაბრუნებულს მცირედს ვნახავდი, მაგრამ სასტიკად შევცდი. მათი ძალიან დიდი უმრავლესობა კვლავ დაავადებულია და სადაც ადრე ვნახე, ისევ იქ  
მკურნალობს. ადამიანებმა დადებული პირობა არ შეასრულეს. არ მეგონა, ამდენი უმადური თუ იქნებოდა ქვეყანაზე.
ანგელოზს გაეცინა:
-ახლა კარგად მომისმინე - უმადურობა ადამიანის ერთ-ერთი ყველაზე ძლიერი თვისებაა და უფალმა ეს კარგად იცის. და, თუ ადამიანები სნეულდებიან, ეს განა ღვთის ნებაა? არა, მაგრამ მისი დაშვებით ხდება და არა იმიტომ, რომ ღმერთს არ უყვარხართ, არამედ იმიტომ, რომ ამ სნეულებით თქვენს სულს და გულს ასუფთავებს. ზოგისთვის ეს სასჯელია, ზოგისთვის გამოსასყიდი. განა, არ გაგიგია, წმინდა მამები როგორ ნატრობენ სნეულებას, რათა აქვე დაიტანჯონ, ამქვეყნიურ ცხოვრებაში, რომ შემდეგ უფალთან დაიმკვიდრონ ადგილი? თქვენ რომ იცოდეთ რამდენ ტკივილს, ტანჯვას და სნეულებას გარიდებთ უფალი, გაოგნებულები და რეტდასხმულები ივლიდით. ის კი მხოლოდ იმდენს გიტოვებთ, რამდენიც ისევ თქვენი სულებისთვის არის საკურნებელი. უფალი რომ არ გიფარავდეთ, ისეთ სნეულებებს შეგყრიდათ ეშმაკი, ერთ დღესაც ვერ გაუძლებდით ვერავინ. თქვენ კი არათუ მადლიერები, პრეტენზიულებიც კი ხართ უფლის მიმართ. გაიხსენე, ათი კეთროვნიდან მხოლოდ ერთი დაბრუნდა მადლიერების გამოსახატავად. თქვენ გგონიათ, იმ კეთროვნებზე უკეთესები ხართ?
აი, თუნდაც შენ, ეჭვებმა რომ შეგიპყრო, ღმერთმა ასეთი მადლი გიბოძა, ყოვლად დაუმსახურებლად და განსაცვიფრებლად. მიუხედავდა იმისა, რომ მისი ყველა პირობა შეასრულე, ერთხელაც არ გაგხსენებია, რომ მისთვის მადლიერება გამოგეხატა; ერთი ცრემლიც კი არ გადმოგიგდია სინანულისა, რათა გეგრძნო, რომ არ ხარ ასეთი დიდი წყალობის ღირსი და სულ ორი სიტყვა გეთქვა: მადლობა, უფალო.
ღმერთმა კარგად იცის ადამიანთა სულდაცემულობის და მანკიერებების ამბავი და მაინც ისეთი ძალით უყვარხართ, თქვენ გადარჩენაზე ზრუნავს მხოლოდ. თქვენ კი არაფრის დანახვა არ გინდათ. ადამიანები უმადურები ხართ უამრავი ღვთის მოწყალების მიუხედავად. თუნდაც სიცოცხლის მონიჭებისთვისაც კი და არ არის გასაკვირი, თუ არც ჯანმრთელობაზე იქნებით მადლიერნი. რა თქმა  
უნდა, ეს ყველას არ ეხება, მაგრამ, სამწუხაროდ, ადამიანთა უმრავლესობაზე კი შეიძლება ითქვას.
ყველაფერი, რაც შენ გადაგხდა, მხოლოდ შენს გონებაში მოხდა და არა სინამდვილეში (თუ გინდა სიზმარი დაარქვი), მაგრამ მოხდა ზუსტად ისე, როგორც მოხდებოდა, მართლაც რომ ებოძებინა შენთვის უფალს ეს წყალობა და არაფერი დამატებული არ ყოფილა.
იკითხეთ წმინდა წერილი, წმინდა მამათა ნაწერები. იყავით ჭეშმარიტი მორწმუნეები და არა ისე, დასანახად... და მაშინ აღარ გაგიჩნდებათ ასეთი ეჭვები.
აი, ეს შემიძლია გითხრა,"მკურნალო", ჯერ საკუთარი სული განკურნე და შემდეგ ირგვლივაც უამრავი განიკურნება, - ეს თქვა ანგელოზმა უფლისა და ნათელ სვეტად აიჭრა ისევე მოულოდნელად, როგორი მოულოდნელიც და უეცარიც მისი გამოჩენა გახლდათ.

ყოველნი კაცნი ადიდებდით უფალსა მარადის, ამინ!