0 0 21
ანგელოსი ნამთვრალევი
თოვს ღამის თეთრი მთიები -
მოვარსკვლავულია ზეცა,
დაღლილი შენ დაგაქვს ფრთები -
გაფრენა ოცნებად გექცა...
წვდებიან შორეთს ფიქრები -
სამყარო მოუცვავს ლოცვას,
სითეთრეს თოვენ ფიფქები,
ელი ანგელოზის კოცნას...
მოგბეზრდა ქაოსი ქვეყნის -
ამაოება გულს კაწრავს,
შენ ეტრფი ღვთაებრივ წესრიგს
და ეთაყვანები მაღალს...
გწყურია სახელი ძლევის -
ბრძოლაში არა ცნობ დაღლას,
გეძახის დიდება ზეცის -
მიიწევ მაღლა და მაღლა...
სინაზე ცის ლურჯი ფერის -
გნუსხავს ლურჯი ტრფობის ნანა,
შენს ფერხთით სდუმს ლუციფერი -
შენს გულში გამეფდა მამა...
მოგწყინდა სხვა ყველაფერი -
გესმის ცის მუსიკა - შორი,
დგას თეთრ სიკვდილის ამბორი -
შენ და უკვდავებას შორის...
თეთრ სინდისის სამოსელის -
გულის ნების მძლე სისწორით:
შეხვდები მას უშფოთველი -
ცის სიმაღლის დირიჟორი...
როცა წამი სასურველი -
უკანასკნელ მზედ ამოვა,
ჰარმონია სასუფევლის
თეთრ ფიფქების თოვად მოვა...
შენი სულის ნაკვალევის
შესვავ გულით ცისფერ გრძნობას,
ანგელოსი ნამთვრალევი
შეერწყმები მარადობას...