რომ გითხრა ღმერთო ფეხზე მკიდიხარ

მე ამოცლილი ნეკნი კი არა 
ის გული მტკივა რომლითაც გენდე 
ცხვირწინ მიხურე სამოთხის კარი 
და გზა მიჩვენე ჯოჯოხეთამდე

სამოსელ პირველს გაურბის სული
ლეღვის ფოთოლით ვმალე სირცხვილი
ისევ აყვავდა ედემში ვაშლი
ზოგჯერ უკვდავსაც მინდა სიკვდილი

ცრემლში ერევა წვიმის წვეთები 
შენი სურვილის მიჭირს შელევა 
თავად უფალსაც აღარ სწამს თვისი
გველის ტყავს ამაყად მოისხავს ევა

ყველა სატანჯველს ავიტან რწმენით 
ედემის ბაღში ამაყად შეგხვდე 
რომ გითხრა ღმერთო ფეხზე მკიდიხარ 
რომ სიყვარულით კვლავ მინდა შევცდე