* * * (წუთისოფელი რა არის?..)

წუთისოფელი რა არის?
აგორებული ქვა არის.

სადღაც შორს დარჩა ბავშვობა
და სიჭაბუკე თაკარა,
ის ოქროს წლებიც დამშორდა
ჩემი სულივით ანკარა.

დამაკლდა თვალში ნათელი,
სახე ცრემლებმა დაღარა,
მათოვა თეთრი ფანტელი
და თმებს მოედო ჭაღარად.

მინელდა ძალა მუხლებში,
თითქოს ცხოვრებამ დამღალა,
სისხლიც გამიხდა უხეში,
ჭკუაც გამიხდა პატარა.

საწუთრომ, წუთისოფელმა
განა მარტო ეს მაკმარა?
ქალამანივით მომთელა,
სულ აღმა-დაღმა მატარა.