რა არის ჯოჯოხეთი?
ჯ ო ჯ ო ხ ე თ ი ა უღმერთოდ ზეცა... ჯ ო ჯ ო ხ ე თ ი ა შემოქმედის ქმნილება იყო და მსახურობდე უგზო მამონებს... ჯ ო ჯ ო ხ ე თ ი ა ოდენ წყვილი თვალ-ყური გქონდეს, ამჩნევდე იმას, რაც იხილვება და ზოგჯერ არც მას. უმზერდე - ვერ ხედავდე, გიხსნიდნენ - ვერ იგებდე.-- ჯოჯოხეთია. ჯ ო ჯ ო ხ ე თ ი ა შენივ თავი შეუცნობლად, სინდისი - უქენჯნავად, ქვიშა-ცოდვები - უაღსარებოდ... ჯ ო ჯ ო ხ ე თ ი ა დიდგულობდე უკანასკნელი... ჯ ო ჯ ო ხ ე თ ი ა ყველა წიგნი უსახარებოდ, დღესასწაულნი - უსიხარულოდ, დილა-საღამო -- ულოცველად, კვირა დღეები - წირვის გარეშე... ჯ ო ჯ ო ხ ე თ ი ა მძიმე დღენი უმარხვოდ და მარხვანი - ვნებათაგან ზურგშეუქცევლად... ჯ ო ჯ ო ხ ე თ ი ა უმრევლო ტაძარი, უმღვდელო საყდარი, უტაძრო სახლობა... არ- ზიარება ხომ ათასგზის ჯ ო ჯ ო ხ ე თ ი ა, უდასასრულოდ ხმობა ღვთისგან და ამის წილ კი - სმენით ყრუობა, კართა დაგმანვა შემომსვლელისთვის... ჯ ო ჯ ო ხ ე თ ი ა უჯვარო ყელი, უსულიწმინდო სხეული, ნაყროვანი ხორცი... ჯ ო ჯ ო ხ ე თ ი ა უცნობლობა შენივე სულის, უცხოობა სასუფევლისა, სიშორე უფალთან... და ნეტარებაც ჯ ო ჯ ო ხ ე თ ი ა , თუკი ღვთის ,, საზღვრებს“ გარეთ შემდგარა... ჯ ო ჯ ო ხ ე თ ი ა ქენჯნად ქცეული ნასინდისარი ქრისტეს მეორედ მობრძანებისას და გაფიქრება : ,,თურმე ყოფილა!“... რა ამაოში გაუფლანგავს ედემში მკვიდრობისთვის განკუთვნილი იმიერ ჟამი... აქ კი...აქ უხორც - უსამოსო სული ამოჰყვა, სული, რომელზედაც აღარც უფიქრია, სული ცოდვიანი და უღირსებო, უფლის ხატება - მსგავსებისგან გადარეცხილი... ჯ ო ჯ ო ხ ე თ ი ა კაცთ მისიის გვიან უწყება : თურმე რა უნდა გეკეთებინა და რას იქმოდი (!)... ჯ ო ჯ ო ხ ე თ ი ა ცდომილისთვის მხოლო სიმრთლე, წუთისოფლად ყრუ სინდისის ამჟამის ქენჯნა; მდუღარე ქვაბი, კოცონია თვით შენი განცდა... ჯ ო ჯ ო ხ ე თ ი ა განსჯად მოსული ქრისტეს სიტყვა : ,,ჭეშმარიტად, არ გიცნობ უკუნისამდე!...“ ჯ ო ჯ ო ხ ე თ ი ა მაცხოვრის ზურგი (!)... და მობრუნებაც ჯ ო ჯ ო ხ ე თ ი ა , ჰო, ჯოჯოხეთი! ცეცხლად იკოცონ - ივულკანებს ეს მოტევებაც, რამეთუ უღვთოდ, უმაცხოვროდ შენივე სული გაიძარცვე სასამოთხე ნეტარებისგან, სული, რომელსაც დიდების ამ ჟამს ჯვარცმულისგან ეს სიტყვები უნდა სმენოდა : ,,მ ო დ ი ჩ ე მ თ ა ნ, მამაჩემის კურთხეულო...“ 2005 წ.
© POETRY.GE 2013 - 2024
@ კონტაქტი
0 კომენტარი