From Rural to Plural – The power of non-formal educaton in rural areas

ცოტა ხნის წინ მქონდა პატივი, მონაწილეობა მიმეღო Erasmus+ პროექტში „From Rural to Plural – The power of non-formal education in rural areas“. ეს რვადღიანი ტრენინგ-კურსი არ ყოფილა მხოლოდ საგანმანათლებლო გამოცდილება – ეს იყო ღრმა პიროვნული განვითარება, ხედვის გაფართოება და შთაგონება, რომელიც მარწმუნებს, რომ განათლებას ძალუძს რეალური ცვლილებების მოხდენა.

პროექტის განმავლობაში სხვადასხვა ქვეყნების ახალგაზრდებთან ერთად ვსწავლობდით არაფორმალური განათლების მეთოდებს, განვიხილავდით აქტუალურ სოციალურ საკითხებს და ვქმნიდით ინკლუზიურ აქტივობებს, რომლებიც შეიძლება ეფექტიანად გამოიყენოს ახალგაზრდულმა ორგანიზაციებმა სოფლის თემებში.
გავეცანით ისეთ თეორიებს, როგორებიცაა კოლბის გამოცდილებით სწავლა, მასლოუს საჭიროებების იერარქია და ბელბინის გუნდური როლების მოდელი – თითოეული მათგანი ჩემთვის გახდა ახალი ხედვის კარი, რომელიც არა მხოლოდ თეორიული ცოდნის მიღებას, არამედ მისი პრაქტიკაში გამოყენებასაც გულისხმობს.

მნიშვნელოვანი იყო ისიც, რომ აქტივობები ემყარებოდა თანამშრომლობას, ერთმანეთის მხარდაჭერასა და თანაბარ ჩართულობას. ვისწავლე, როგორ დავგეგმო სასწავლო პროცესი ისე, რომ არავინ დარჩეს გარეთ – არც სქესის, არც სოციალური სტატუსის, არც წარმომავლობის გამო.

მაგრამ ყველაზე დიდი ღირებულება ამ პროექტმა იმაში მომცა, რომ დამანახვა – სოფლად მცხოვრები ახალგაზრდების პოტენციალი უსაზღვროა, თუ მხოლოდ მივცემთ მათ სწორ ხელსაწყოებს, მოტივაციას და შესაძლებლობას, რომ თავიანთი თავი დაინახონ ცვლილების წყაროდ.

რატომ უნდა აირჩიო Erasmus+?
დღეს ბევრ ახალგაზრდას ჰგონია, რომ Erasmus+ მხოლოდ "საუკეთესოებისთვისაა" – მათთვის, ვისაც სრულყოფილად ესმის ინგლისური, ცხოვრობს დიდ ქალაქში ან უკვე არის აქტიური საზოგადოებრივ საქმიანობაში. მაგრამ პირადად დავრწმუნდი, რომ Erasmus+ სწორედ იმ ადამიანებისთვისაა, ვისაც ყველაზე მეტად სჭირდება ხმა – ახალგაზრდებისთვის სოფლად, ვინც ხშირად დაჩაგრულია გარემოს მოლოდინებით და შესაძლებლობათა სიმწირით.

ეს პროგრამები გვაძლევს უნიკალურ შანსს – გავდივართ ჩვენს კომფორტის ზონას მიღმა, ვსწავლობთ საერთაშორისო გარემოში, ვუერთდებით ინკლუზიურ ჯგუფს და თან ამ გამოცდილებას ვაბრუნებთ ჩვენს თემში. ეს ცოდნა აღარ რჩება მხოლოდ ჩვენს გულში – ის ცვლის სხვებსაც, ჩვენს გარშემო.

ჩემი გზავნილი შენთვის:
თუ ოდნავ მაინც ფიქრობ, რომ მეტი შეგიძლია; თუ გრძნობ, რომ შენი ხმა არ ისმის; თუ გაქვს სურვილი, განავითარო თავი და იმოქმედო სხვებისთვის – Erasmus+ შენთვისაა.
ეს არ არის უბრალოდ მოგზაურობა ან სასწავლო კურსი. ეს არის ინვესტიცია საკუთარ თავში და იმ ადამიანებში, ვისთან ერთადაც ცხოვრობ. ეს არის ნაბიჯი უკეთესი მომავლისკენ – არა მხოლოდ შენთვის, არამედ მთელი თემისთვის.

გადააბიჯე შიშს, სცადე და გახდი ცვლილების ნაწილი. ცოდნას საზღვრები არ აქვს – ის იწყება იქ, სადაც გაბედავ პირველად.