წუთისოფლის ერთი წუთი

ერთი წუთის ისტორია
ტომეულებს ეყოფოდა შესავსებად:
სად ... ისმება სადღეგრძელო მხიარული
ნეფე-ქალის  სილამაზის შესაქებად;

სად... სიცოცხლე იბადება
დედის გულის ნეტარებად;
სად... უძლური მოკვდა ისე,
ვერ მოასწრო საბოლოო შეძახება…

სადღაც ტყვია იტენება,
სისხლიანი ბრძოლისათვის გამიზნული,
ძმა უმზადებს ძმას სამარეს,
ფიცის ფასი არის ნული…

სად   სინათლე ულევია,
მაგრამ , მაინც დაეძებენ მეტ სინათლეს,
სად  სინდისი იყიდება
და გაყიდულს  ,,ერთგულება“ დაანათლეს…

სადღაც კივის მიკიოტი
და დევნილი პირქუშ ტყეებს ეფარება…
სად   მსუქანი ჯიბის მქონე - 
სხვის  დაკემსილ ათას ჯიბეს ეტანება....

სადღაც სარკე გაიწმინდა,
საუკუნის მტვერნაყარი,  დაბინდული
და გამოჩნდა ,  რაოდენი ტკივილია
ამ ცხოვრების ლაბირინთში გარინდული…

სადღაც რეკავს მაღვიძარა - 
მოსახდენი განსაცდელის შეხსენებად...
და ჩათვლემილ ჟამთამწერელს
ერთი წუთი - საუკუნედ ეჩვენება...