ამბავი ჟოლოს ჩაის შესახებ

- ჟოლოს ჩაის არც სიტკბო მოაქვს, არც სიმჟავე.
- მაკოცე და ტკბილი გახდება.
- შენ, რომ არ იქნები, არც სიტკბო უნდა ჰქონდეს და არც სიმჟავე?
- მე, რომ არ ვიქნები, ცხადია სიმჟავე გაიმარჯვებს.
- შენ ხუმრობ, მაგრამ ჩემთვის პრობლემატური საკითხია.
- ჟოლოს ჩაი? (იცინის)
- რა გაცინებს, მართლა ვამბობ. 
- მაშინ ლიმონიანი ჩაი დალიე, ჰო გიყვარს.
- ჟოლოს ჩაის დალევა როდესაც მინდა, ლიმონიანი ჩაი დავლიო?
- თუ გინდა საერთოდ არ დალიო.
- მინდა, უბრალოდ ჟოლოს ჩაი, რომელსაც ჟოლოს გემო ექნება.
- სხვა ვიყიდოთ.
- რამდენჯერ ვიყიდეთ ახალი, რომ ძველი გემო დაგვებრუნებინა, მაგრამ ყველა ასეთია.
- და რატომ აიტეხე ჟოლოს ჩაი? რომელიც გემრიელია ის დალიე.
- აშკარად არ გესმის პრობლემის სიმძიმე, მე როდესაც შენთან სექსი მომინდება, სხვა ქალთან წავიდე?
- მე ვარ ჟოლოს ჩაი? პირდაპირ მითხარი რა გინდა.
- რაც მიყვარდა ფუჭდება და შენ რას მირჩევ, რომ შევცვალო? 
- ეს საუბარი ჩემზეა თუ ისევ ჩაით გამოწვეულ კრიზისზე?
- ჩაი არაფერ შუაშია.
- გასაგებია, ესეიგი ჩემზეა.
- თუ რაც მიყვარდა კარგავს გემოს, გეკითხები, როგორ შეიძლება ამ პრობლემის გამოსწორება?
- ჩემი აზრით, ჩემი ტუჩები ისევ გემრიელია.
- გასინჯე?
- რა გინდა?
- მე მინდა, ის ჟოლოს გემო, რომელიც მიყვარდა.
- მგონი პრობლემა შენშია.
- სიყვარული პრობლემების გარეშე ვერ იარსებებს.
- შენი და ჟოლოს ჩაის სიყვარული?
- სამწუხაროა, რომ ვერაფერს იგებ.
- სისულელეებზე დარდობ.
- ჟოლოს ჩაის რომელსაც ცხელს ვსვამდი, ბოლო დროს სულ ცივია, აღარ არის გემრიელი და ვფიქრობ, ხვალ, რომ ამ სახლში აღარ ვიყო, ჩემს მაგივრად სხვაც გააკეთებს.
- აღარ გიყვარვარ?
- მე მიყვარს, ის ძველი გემო, რომელიც აღარ გაქვს.
- მაშინ დამშორდი.
- შენი აზრით მარტივია?
- როდესაც სიყვარული ქრება, ალბათ მარტივია.
- მარტივად მთმობ და ამაზე მაქვს საუბარი.
- შენ აღარ გიყვარვარ.
- ზედმეტად შეიცვალე და მე მიყვარს, შენში ის ადამიანი, რომელიც აღარ არსებობს, მაგრამ არ შემიძლია გადაგიყვარო.
- დღეიდან მოგიწევს, როდესაც ჟოლოს ჩაი მოგინდება, ლიმონიანი დალიო.