,,ალტერ ეგო"

მარადმწვანე ბადიანი...
ქოხს შინ- ორი:
მე და ჩემი ,,ალტერ ეგო"...
       რა დილაა!
მაგიდაზე- ფორმატები... ,,კოჰინორი"...
და ,,ას ექვსზე" მომართული რადიოლა

აფრქვევს ჰანგებს: ,,ჭერს ნუ ახდი, ნუ, სახლს ქარო!
ნუ დაამსხვრევ გადაქცეულ ღობეს, შორებს..."
   ჩემში, ეგო,- შიშველი და უსახლკარო,
ჰგავს დუმფარებს შეფარებულ გომბეშოებს!

რადიოლა უკრავს მშვიდად... ძალზედ მშვიდად 
და შეგრძნება ,,ალტერ ეგოს", ალბათ,- შური!
შურს სიმშვიდე და იმსხვრევა მსგავსად,- (შვიდად...)
გამჭვარტლული, ძველი ლამფის აბაჟურის!

გავექეცი. ქოხმა კარი მიხურა და
ორი მილი ფეხაკრებით გავიარე.
ჩიხებიდან ,,ალტერ ეგო" მიყურებდა...
მიყურებდა, ვით საშიში გავიალი.

ხითხითებდა... 
ქუდს იხდიდა: ,,კაი ,,სალამ"! "
(დაღმართები... აღმართები...და აღმართი...)
გონებაში ჭრელი დაფა გაიშალა!-
როქი...- როქი... ლაზიერი... და შახ- მატი!

არის! 
(ყველგან თოვლი... თოვლი... თუმცა, არ თოვს!
    ალბათ, ყინვას აფარებენ თავს- შიფერს და
    მე სახლს, ჩემს სახლს ვუბრუნდები, უკვე, მარტო!-)
მოვიშორე ,,ალტერ ეგო"! 
ტაში...
ფარდა...

დავითხოვე ხასიათი- ოხ!- მინორი! 
მაჟორები კი არ თოვენ,- ბარდნიან- ვის
არ მოხიბლავს თაბახები... ,,კოჰინორი"...
და ფანჯრიდან- მარადმწვანე ბადიანი.

თამთა მუმლაძე ✏