ფანქრების სიგარები

,,რა უცხოა საკუთარი პანაშვიდი..."
(შევიკარი, ქუდიანი.)
      (მოცდა...)
      (ხურდა...)
მისამართი- ლიფტის მარცხნივ, ბინა- 7,
შავი კარი, ქურდიანის 25.

ზარი წივის. 
(თითქოს გულზე ზოდი აქვსო...)
სიბნელეში ფეხმორთხმულა აბრა- ბუდად.
გარდაცვლილნი:

      ფანტაზიის ზოდიაქო;
      აზროვნება,- 
                    დალექილი აბლაბუდად.

ორი აბი
                 (წამლებს სევდის გამო ვიღებ.)
და ფიქრები მზა თავიდან გავა ბოლებს...
წვიმს.
საფერფლედ ერთ-ორ თაბახს გამოვიღებ
და ფანქრების სიგარებსაც გავაბოლებ,

    რა უცხოა კაეშანის პანაშვიდი...
ფიქრში გვერდით ჩამოივლის საღამოც და...-
,,მისამართი: ლიფტის მარცხნივ, ბინა- 7,
მუქი კარი, ქურდიანის, სადღაც- ოცდა..."

თამთა მუმლაძე ✏