0

საახალწლო ამბავი


კარგად ვიყო.
ან:
კარგი ვიყო.

ორიდან ერთი სურვილის
ჩაფიქრება შეიძლება
მხოლოდ და მხოლოდ
დაბადების ახალწლის ღამეს
დაბადებამდელ ქვეყანაში.

და ყველაფერი ისევე ხდება
დაბადებამდელ ქვეყანაში
დაბადების ახალწლის ღამეს,
როგორც ყველგან ხდება ხოლმე
ახალწლის ღამეს:

ზოგი ქილიკობს
ჩაფიქრების ჩვეულებაზე
ზოგი ჯიუტად ჩაიფიქრებს
ორივე სურვილს -
იქნებ იცის, რომ ვერ მოასწრებს,
ამოირჩიოს.

ზოგი - რომელმაც არ იცის, რომ
ვერ მოასწრებს,
ამოირჩიოს -
ვერ ასწრებს, რომ ამოირჩიოს.

ზოგი კი ზუსტად ისე იზამს,
როგორც წესია -
ერთადერთ სურვილს ჩაიფიქრებს
ორადორიდან:

კარგი ვიყო
ან
კარგად ვიყო

და ამის მერეც
ყველაფერი ისევე ხდება,
როგორც, საერთოდ, ხდება ხოლმე
ახალწლის მერე;

და ამ სურვილის მომავალიც
ისეთივეა,
როგორიც
ყველა ახალწლის ღამეს
ჩაფიქრებული
ყველა
სურვილის:

დაბადებულობის წელიწადში
ის
ან ახდება
ან არა.

წყარო: www.biblioteka.litklubi.ge

კომენტარები (0)