მე კალმახი ვარ არაგვისა ..

მე კალმახი ვარ არაგვისა, ტანდაწინწკლული,
მთის ჩანჩქერებთა ჩქარ ჩქერებთან ძმადგაფიცული,
ავყვები აღმა მდინარეს და შენ ხარ სათავე,
ჩავყვები წყალს და ჩემს სავალ გზას კვლავ შენ ამთავრებ.
მე კალმახი ვარ, ასხლეტილი ტალღის სარკეზე,
ჟინით დავეძებ სატყუარას, ბადეს, ანკესებს.
მე გვერდს ავუვლი ყველა ანკესს, ბადეს და ფაცერს
და ბედის კარავს შენი მზერის ბადეში დავცემ.
მე კალმახი ვარ - სატყუარას ადევნებული,
სატყუარაა შენი მკერდი ამტევნებული,
გიჯობს, მოდი და ზღვათა მეფე ღორივით დამკალ,
ვიდრე ლაყუჩში გამიყრიდე უარის ჩანგალს.