ჩერქეზას

,,ძმა,
                                ეს ცხოვრება სიკვდილად არ ღირს"
                                           ნიკა ჩერქეზიშვილი

                                ,,ძმა,
                                რანაირად ხრჩოლავს ამინდი,
                                მომწყინდა გულის ხელით ტარება."
                                            ნიკა ჩერქეზიშვილი


ნიკა, შენ ჩემში ჩადევი ნაღმი,
იცი, რა მიყვარს, აი, შეხედე:
,,ძმა,ეს ცხოვრება სიკვდილად არ ღირს"-
და ვეუბნები გზაში შემხვედრებს
მაშინაც, როცა გარეთ ამინდი
ხრჩოლავს და გულსაც ხელით ვატარებ.
მე ვიცი ძმაკაც როდის წავიდე
და როცა წავალ გამოატანე
შენი ლექსების სითბო და სევდა
ქარებს,
კისრიდან -ცრემლის კამარა.
ვცხოვრობ და მარტო არა ვარ ბედად,
ვცხოვრობ და ვნანობ-ბევრგან არა ვარ.
............................................................
მე ახლა შენთან მოვდივარ, ძმაკაც,
ჩამოვიტოვებ უკან მალაკნებს.
ამღვრეული ვარ დილიდან რაღაც,
მოვალ და რამე მელაპარაკე.

წყარო: urakparaki.com