ტყული თუ მართალი

სახუმარო მინდა გითხრა,
ადანდალი, დანდალი,
უპასუხე ჩემს შეკითხვას,
ტყუილი თუ მართალი.

გაზაფხული მიილია,
დადგა ცივი ზამთარი,
ტყუილი თუ მართალი?
(ტყუილი)

ძლიერ უყვარს ფისუნიას
მსხლის და ვაშლის ნათალი.
ტყუილი თუ მართალი?
(ტყუილი)

იანვარში თოვლი იდო,
თეთრად ჩანდა ჭადარი.
ტყუილი თუ მართალი?
(მართალი)

შუაღამით მინდორ-მინდორ
სეირნობდა ქათამი,
ტყუილი თუ მართალი?
(ტყუილი)

დაძუნძულებს ტყეში დათვი
თაფლის ჭამით დამთვრალი.
ტყუილი თუ მართალი?
(მართალი)

ცხვრის ბეწვისგან დავამზადეთ
აბრეშუმის ფართალი.
ტყუილი თუ მართალი?
(ტყუილი)

ჯორმა კვიცი გააჩინა
მეტისმეტად გამხდარი.
ტყუილი თუ მართალი?
(ტყუილი)

ლოკოკინას ტანად ჩიას
მხრებით დააქვს სახლ-კარი.
ტყუილი თუ მართალი?
(მართალი)

საბუდარში კატა იწვა
სახლს იკლებდა კაკანით.
ტყუილი თუ მართალი?
(ტყუილი)

ერთ დღეს ჭამა მამლაყინწამ
ერთი ტონა თავთავი.
ტყუილი თუ მართალი?
(ტყუილი)

მტაცებელი ცხოველია
ვეფხვი, ლომი, აფთარი.
ტყუილი თუ მართალი?
(მართალი)

გამოცანა გითხარ ლექსად,
სულ ეს არის, რაც არის.
კარგ მთქმელსა და გამგონესა
ენის წვერზე შაქარი.