მოვიწიო მოსავალი ხანძრიდანაც ..

მოვიწიო მოსავალი ხანძრიდანაც,
რომელიც მთელ სახლს მოედო.
ანუ მტევან-მტევან ამოვზიდო ცეცხლიდან
სიმართლე დედაზე –
ნივთებმა სიმწრისგან რომ აღიარეს დანახშირებამდე.
ნაცარი კი სამახსოვროდ მეგობრებს.
ნაცარი სამახსოვროდ ყველა მეგობარს.
ნაცარი სამახსოვროდ ცხრათვალა მეგობრებს.
გახსნიან ჩანთებს
და გამოხსნიან უჯრებს
და ყველგან
ჩემი სახლის ნაცრისფერი ბუღი.
ეს ადვილი დასავიწყებელია.
ერთი სულის შებერვა
და ყველანი დაიწმინდებით.
ეს ადვილი დასავიწყებელია.
ოღონდ, ამომთხარონ პირიდან
გრიგალები და სეტყვაც – მარცვალ-მარცვალ.
დედა, მე უკვე ვიცი
ყველა საშიში საიდუმლო ამქვეყნად.
ჩუ, საყვარელო,
არა, საყვარელო.
ჩუ…