ძნელი ყოფილა

ძნელი ყოფილა მარტოობა,
უკაცურობა-უარესი;
ძნელი ყოფილა მუხლთ მოკლება,
გული რომ გერჩის-უარესი;

ძნელი ყოფილა უმეზობლოდ,
უმოკეთეოდ უარესი;
ძნელი ყოფილა წვრილშვილობა,
უშვილბოლობა-უარესი;

ძნელი ყოფილა სხვათ იმედი,
შენი რომ არ გაქვს-უარესი;
ძნელი ყოფილა ცხენის მოვლა,
სხვა რომ შეჯდება-უარესი;

ძნელი ყოფილა მამულთ ღორღვა,
სხვა რომ ხელს მოჰყრის-უარესი;
ძნელი ყოფილა ძმა რომ არ გყავს,
მტერი რომ არ გყავს-უარესი;

ძნელი ყოფილა უაბჯრობა,
რომ დაჟანგდება-უარესი;
ძნელი ყოფილა შვილის წურთნა,
რომ ვერ გასწურთნი-უარესი;

ძნელი ყოფილა სიმართლის თქმა,
სიმართლის ვერ თქმა-უარესი;
ძნელი ყოფილა ტოლ-სწორობა,
ბოლოს გატანა-უარესი;

ძნელი ყოფილა მთის გადავლა,
რომ გადაივლი-უარესი...
ძნელი ყოფილა მარტოდ ფიქრი,
მარტოობაზე უარესი!

წყარო: litklubi.ge