0

ამინდი: სიჩუმე


ნუ  იტყვი, ნუ მოყვები ზაფხულებზე,-
მწარეა შიშველ მზეზე ხელშევლება.
მღვრიემდე  ჩასვლების და დახრჩობების
არ მოყვე - არშველების. ვერშველების.

გავჩუმდეთ, გაჩუმება დროულია.
ჩავწყდები, როგორც  ხიდან ჩიტის ბუდე.
ართოვაც დროულია, არწვიმებიც,
არყოფნაც  - უშენობა. უჩვენობა.

ამ ქუჩას გადააგეს  სხვა ქუჩები,
იცოდი,  თუთებიც რომ  გადაკაფეს?
მე  ახლა, მიწებსა  და ბალახებზე,
სხვა ამბებს გავჩუმდები, სხვა არაკებს,

ოღონდაც, გადარჩენის  აღარ მითხრა-
მოვლენ და უფრო კარგად უშველიან
ღმერთები, წმინდანები, მისთანები...
ჩვენ ჩვენთვის - უჩემობით. უშენობით.

მე ჩემთვის - შენს გარეშე, მზის გარეშე,
შენ შენთვის - უჩემოდ და უმზეობოდ.
არ მოყვე, არშველები, ვერშველები,
მღვრიემდე ჩასვლები და უმწეობა.

წყარო: urakparaki.com

კომენტარები (0)