ტრაგედია

'მშვიდობით, მწვანე სატაცურო'
ე. მ. რ.

ისეთნაირად აეწყო რომ მორიელებმაც
დამკბინეს. წყალსაც წავუღივარ. ფარდების გარდა
დიდი ხეები შრიალებენ მორიგეობით.
ბაღს. როგორც სხვასთან გაქცეული ცოლის გარდერობს

დავცქერი. ჰოლში ტურისტები ცეკვავენ ვალსებს.
იქნებ კიდევაც ვენატრები ბინგოს. კურცჰაარს.
ან იქნებ. მწვანე სატაცურო. აღარ არსებობს
სიმშვიდე. თვითონ მეტაფორა ჩემთვის უცხოა.

არსებობს დიდი ხეები და დიდი პანიკა.
თუნდაც დაცემის კლასიკური მაგალითები.
შემინდეთ. წყალსაც წავუღივარ. თქვენ ვერ გამიგებთ.
ვშიშობ რომ თვითონ მეგობრებიც ვერ გამიგებენ.

თოთო სიკვდილი გულს ამოტეხს ახლა შიგნიდან.
არ მინდა. მათი მწუხარება წარმოვიდგინო.