მარტოობა

აჰა, ეს ლექსიც
სიგარეტის ნამწვივით ჩაკვდა,
უფრო ზუსტად, ძალით ჩაკალი...
და მიადექი მაღალ მთაზე აღმართულ ეკვდერს
ხელის კანკალით...
იქ ვინ შეგიშვებს?!.
იქ გვირგვინი დაადგეს ქრისტეს, -
შენ გბაწრავენ ჭრელი გველები...
გახსოვს, ახლახან გულთმისნების სიმშვიდით გითხრეს:
"რა გეშველება?.."
არც არაფერი...
ცა შებოჭა ღამემ ბინდებით,
გახსნა მთვარე - ვერცხლის კონვერტი...
და მარტოობაც სხვანაირად გეამინდება,
როგორც ყოველთვის.

წყარო: urakparaki.com