მზე თითქოს გულში იხუტებს ნაძვნარს

***
მზე თითქოს გულში იხუტებს ნაძვნარს,
მიწის სურნელი ზეცამდე წვდება.
ალუჩას ფერად ფოთლებზე ცრემლი
დიდხანს კამკამებს და უცებ წყდება.
რძისფერი ორთქლი ახურავს ნაძვნარს, 
ღიღინით დადის ყანაში მამა.
ხეებს მწვანე თმას უვარცხნის ვიღაც,
მზე სხივით ქარგავს უხვ ფერთა გამას.
ბუტბუტებს წყალი თამარის ხიდქვეშ,
ლურჯი ოცნებით სავსეა გული.
ამაღლებულა კარათი ცამდე,
გოროზად მდგომი და მუდამ ჩუმი.