ღამე მღეროდა ლოთივით

ღამე მღეროდა ლოთივით,
ჩრდილებს ფერხულში იწვევდა.
შენამდე კი არ ვცხოვრობდი,
უბრალოდ, ყოფნა მიწევდა.
თუ შემიყვარდი - ბოდიში...
თუ შემიყვარებ - მადლობა...
არც პასუხისთვის არა გწერ
და არც მოველი დანდობას.
ჩვენი შეხვედრა ვინა სთქვა,
სად დაწერილა, როდიდან?
გამარჯვებული ვბრუნდები
მე წაგებული ომიდან.
მაგრამ მომესმა უეცრად
ფანჯრის რაფიდან ჭრიჭინი - 
ეს სექტემბერიც წასულა
პირველკურსელი ბიჭივით...