ჰორიზონტს იქით ნისლი ჩამოწვა

ჰორიზონტს იქით ნისლი ჩამოწვა
წარღვნას ქადაგებს შავი ღრუბლები
ცის ლაჟვარდს სვავნი დასტრიალებენ 
ცივსისხლიანი ბოღმის გულებით

ტყე შეარხია ნელმა ნიავმა
გრიგალს თან მისცა რისხვის ალამი
ცამ მქუხარებით ამოიოხრა
ელვამ გარიყა სვავთა ვარამი

ქარმა არია ფრინველთა გუნდი
წვიმამ გარეცხა სვავთა გულები
ამალით მოდის ქარიშხალი და
წარღვნას ქადაგებს შავი ღრუბლები

ქარმა გაკვალა წარღვნის ბილიკი
ბნელმა ნათელში იწყო შერევა
ცამ თითქოს რისხვით მორთო ტირილი
ელვამ თან იწყო ბნელზე შეტევა

ამ აურზაურს მოეღო ბოლო
მალე მიწყნარდა ტყეც და ბუნებაც
თითქოს გრიგალმა იკრა ნაბადი
და გაეშურა გაჰყვა დინებას

ცისკრის ვარსკვლავმა ამოანათა
კვლავ გააღვიძა დედა-ბუნება
აღარსად მოჩანს შავი ღრუბლები 
სვავთა ამალაც გაჰყვა ცდუნებას