კლდე იშორებს პირზე შხეფებს

ტალღა ნაპირს ეხეთქება, 
კლდე იშორებს პირზე შხეფებს, 
მინდა შეგხვდე ისე, როგორც
ია ხვდება პირველ შემხვედრს... 
მინდა შენი სილაჟვარდე, 
მინდა შენს ცას დავენახო; 
მინდა შეგხვდე ისე, როგორც
ვაზი ხვდება სავსე  ნაყოფს... 
ქარებს ხელი არ გაუშვა, 
ძალას იგრძნობ მოჭიდებით, 
მინდა შეგხვდე ისე, როგორც
მზეს ხვდებიან ლურჯი მთები... 
დავდივარ და ყველგან გეძებ,
დარდით ფეხი გამენასკვა;
მინდა შეგხვდე ისე, როგორც
ღამით ხვდება მთვარე ვარსკვლავს...
აზრს სიცოცხლე კარგავს მაშინ,
როცა იმედს კარგავს გული,
მინდა შეგხვდე ისე, როგორც
წყაროს ხვდება ნაკადული...
ჯერ ადრეა სიცივემდე,
სანამ ისევ ბარში მოთოვს;
მინდა შეგხვდე ისე, როგორც
ტოტი ხვდება გაშლილ ფოთოლს...
უთხარ შენს ცას -  გამონათდეს
და ჩემი მზე დაიფიცოს;
მინდა შეგხვდე ისე, როგორც
დედა ხვდება თავის პირმშოს... 
შენ წამოდი, ნოემბერი
უცილობლად დაგთანხმდება... 
მინდა შეგხვდე ისე, როგორც 
შემოდგომა ზამთარს ხვდება...

გ.ო.