მე ვნახე ჩიტების ღმერთი

მე ვნახე ჩიტების ღმერთი, 
ფლორენციაში,
დუომოს მოედანზე,
მოლბერტზე დახრილი 
ლაბირინთს ხატავდა.
- მე ვიცი, ვინც ხარ - გავიფიქრე.
- ყველა იმას ხედავს, რაც უნდა -
თქვა თავაუღებლად
და მხრები ოდნავ შეარხია.
არასდროს მინდოდა ღმერთობა.
აი, ხე კი ვიქნებოდი,
წყლის სინათლეში 
გავწვებოდი განაკაწრივით.
განა ასე მკაცრი იქნებოდა
ცხოვრება, 
ხე რომ ვიყო,
ჩიტების ხმის შემფარებელი?