ცისნაკაწრი ნართაული
ვით ხილვას, ისე, ცასაც უფრთხები, ცას გადაჰკაწრავ სულო, ჩხიკვივით. ცის ცრუ აღთქმაზე ჩასაფურთხებლად — ნისკარტით ღმერთის დუმილს მიჰკივი! ცხრა ჯოჯოხეთს კვნეტს ცაზე ბინდბუნდი, ეფემერულ მზეს სწყდება ჩქამივით. ბეტონის ცისკენ ზურგით მივბრუნდი — სანამ ნეონის წყევლა ჩამივლის! ქერუბიმებმა თავი დახარეს, ნეონის ჯვარზე ვკვნესი ზენაარს. ვარდი ბეტონში შერისხული ისე ხარხარებს — ცის ჭრილობაზე ამოსული ნათელფენაა! თავდაღმა ჯვარზე — გაკრულდამწვარი — შეჩვენებული ვარდი — სხვაშია. სულო — მზეს სიზმრით გადაასწარი — ვით ჯვარცმულ ვარდში უკვდავ ხვაშიადს! სულო — ხვაშიადს გვერდს ვერ აუვლი, ვარდის ჭრილობა უბრად თუკია. ცის ამოშლილი ვარ — ნართაული და გრამატიკა უბადრუკია... სისხლიან ცის და ცასაც უფრთხები, ცას გადაჰკაწრავ სულო, ჩხიკვივით. ცის ცრუ აღთქმაზე ჩასაფურთხებლად — ნისკარტით ღმერთის დუმილს მიჰკივი! მიხეილ ჭიჭინაძე (მიქაელი) 2026
შეგიძლიათ გააზიაროთ მასალა, თუ მიუთითებთ ავტორს.
0 კომენტარი (კომენტარები გამორთულია)