ფეხშიშველი ჯოჯოხეთი


ვარსკვლავები -
სამყაროს ჭრილობებიდან
გაჟონილი მარილი.

ფეხსაცმელებმა მიმატოვეს:
ზედმეტ მიწას ატარებ, -
ამბობდნენ.

ჯოჯოხეთში ღმერთს თავი აკლია,
მის ჩრდილს - არაფერი.

კუთხეში ეშმაკი ზის,
ყველაზე მშვიდი კაცი.

ეშმაკს აცვია დახეული ბილბორდი -
ქალაქის ყველა ცოდვა
მის მხრებზე რეკლამად კიდია.

მე გავდივარ.

ფეხშიშველი.

ეშმაკმა შემომხედა,
გაიღიმა:

- ბოლოს და ბოლოს, ადამიანი.


ავტორი: მიხეილ ჭიჭინაძე (მიქაელი)
2020

შეგიძლიათ გააზიაროთ მასალა, თუ მიუთითებთ ავტორს.

0 კომენტარი (კომენტარები გამორთულია)

© POETRY.GE 2013 - 2026

Facebook Telegram კონტაქტი