0 0 26
ოფელიას
- ღვინო რწმენით ნაფერია,
ყველა წვეთი გეფერება.
შეიფერე.
- გული გადასხვაფერდა,
სიხარული დაბერდა...
- ფერდობები სხვა ფერის,
ცები გადანაფრენი,
შეიფარე.
ღამეული ფიქრები ცოცხლდებიან, მოგელიან,
ლურჯ წლების დავიწყება, რა ძნელია, ოფელია!..
გარწმუნებ გამძაფრებით:
თუ არ დაიზაფრები,
სურნელება შაფრანის
მიგაცილებს აფრამდე.
სულს მიანდე სხეული,
მრავალ ტანჯვით სნეული,
და მშობელი ღვთის ხელი
ისევ მოგეფერება!
ვაჰ... რომ არ გეჯერება, დახვალ სოფლად, ეული...
გტანჯავს: შენი სიშორე,
მოზღვავება ვნებათა,
წუთისოფლის სიშმორე,
მარტოობის ნებართვა,
ჯანღი გაუთეველი,
სიტყვა დაუტეველი,
მიწა დაუთოველი,
გულისცემა ყოველი...
2023
