მერერა

ლექსები

ნინო დარბაისელი

მერერა
(ანას - იუმორისტული)

იცნობ ასეთ კაცს, სახელად
“მერერას” რომ ეძახიან?
გაიხდი თანამზრახველად
-  მუდამდღე გულგრილსახიანს?

მერე რა! - ამბობს,  რაც მოხდა, 
 ხდება ან მერე მოხდება.
შენ - გულით კვნესა აღმოგხდა?!
ის - ცივად აროხროხდება.

დილა გათენდა?! - მერე რა!
დაღამდა?!  - დიდი ამბავი!
ვერ გამაკვირვებს მე ვერრა,
გასარანდ-გაურანდავი.

ბრძენია! იცის ყოველი, 
წინასწარ,  ვიდრე ეტყვიან,
შენ თანაგრძნობას მოელი?
ყურიც არ შეუბერტყია.

 ქვეყნად  არავის იცოდებს
გოჯი არის თუ ადლია. 
თავისი მაინც იცოდეს
“მერერამ”, - ეგეც მადლია!