ცირკი ანუ შვიდმარცვლიანი ტაეპის რიტმული ვარიაციები

#ლექსმცოდნეობითი_ოპუსები

ნინო დარბაისელი

ცირკი ანუ შვიდმარცვლიანი ტაეპის სახეობანი

ზოოპარკში ხომ ვიყავით რვამარცვლიანებისთვის, არა?!
ახლა ცირკში წავიდეთ შვიდმარცვლიანებისთვის!
მაგრამ მანამდე სავარაუდო ვარიანტები ჩამოვწეროთ:
1. 1-3-3
2. 3-3-1
3. 4-3 ეს - მეოცე საუკუნის პოეზიაში ყველაზე გავრცელებულია, თოთხმეტმარცვლედის დიდ ცეზურასთან გაყოფის  შედეგი მგონია ( გალაკტიონის - ლურჯა ცხენები)
4. 3- 4 - ეს - რაღაც სევდიანად ჟღერს.

5. 3-2-2  აქ - ქორეების შენარჩუნება ძნელია და მეორე პეონში ადვილად გადადის

6. 1-2-3-1
7. 1-3-2-1 
8. 2-2-2-1
9. 2-2-3 აქაც დიქორე სუსტია და მეორე პეონში გადადის
10. 3-2-2

აქაც როგორც რვამარცვლიანებში უმჯობესია, სიტყვების სამეტყველო  მახვილებს დავემთხვეთ და სადაც გაგვიჭირდება, ერთმარცვლიანები მოვიშველიოთ ე. წ “რიტმულ შემავსებლებად”, შოთა რუსთაველის “მართ”, “გლახ”, მუნ”- ის ფუნქციით.

აბა, დავიწყეთ!

1. 1-3-3

ეს-  კეთილი ლომია.
წვრთნის - პატრონი ძალიან,
სულ თამაში ნდომია,
თუ ამისთვის სცალია.

2. 3-3-1

ორკესტრი დაუკრავს დღეს,
დირიჟორს ბატონი აქვს?
უყურებ ძველებურ ხეს?! -
ბოლომდე დაუხრავს თაგვს.

(შეგახსენებთ, ბატონი ჰქვია დირიჟორის ჯოხს)

3. 4-3

მასხარების  ნომერი
უხაროდეს  პატარას!
გაგაცინებს რომელი?
მოვიწყინე. მათ - არა!

4. 3-4 - ეს - რაღაც სევდიანად ჟღერს

 მხედარი დაიღალა,
ცხენებმაც ჩაიარეს,
ნახერხი აიყარა.
არეულს  - მოუარეს!

5. (3-2-2 )

ხმააო უკვე  ზარის,
სკამები?!  -  სავსე   ხალხით!
სეზონის ბოლო არის,
გადასცემს ყველა არხი.

6. (1-2-3-1)

 მას- როცა კულისებს გვის,
მას -  როცა  აფიშებს ყრის, 
შენ  - ფიქრობ, გული აქვს ქვის.
მე  - ვფიქრობ, მარგალიტს ღვრის!

7. (1-3-2-1)

 ცირკს უხდება უცხო  რამ.
ტკბილ მილაკებს ჰყიდის ის.
ქალს დაუძრა გული ხმამ,
მას  სცნობია  ტემბრი ხმის.

 8.( 2-2-2-1)

ბოგირს ხელი არა ჰკრა.
ვატყობ, ცოტა გამცვდარს ჰგავს.
შიშო, გაჰქრი, გაჰქრი, ქრა! 
სახლში  ვიღაც  კედარს რგავს.

9. (2-2-3)

ცირკის ლომიც  - ლომია.
ლომი  - ცირკშიც მეფეა.
მისვლა არა მნდომია,
თვითონ მიცნო,  მეფერა!

10. (3-2-2)

მრგვალია ცირკი ჩვენი,
გარედან -   მგონი, კირქვა.
მაღალზე დგომა შვენის, 
საქებრად ბევრი ითქვა.

დასასრულ,  აქაც აუცილებლად მექნება რამე გამოტოვებული. თუ შენიშნოთ, არ დაიზაროთ მოწერა და  თქვენი წყალობით, უკეთ მოვაწესრიგებ.