უკანასკნელ გზაზე (შექსპირული სონეტი)

#ლექსები
ნინო დარბაისელი

უკანასკნელ გზაზე
(შექსპირული სონეტი)

უკანასკნელ გზაზე გავაცილეთ იგი,
იყო ყვავილები, გვირგვინების წყება.
მოგვყვებოდა მძიმედ მანქანების რიგი.
იწყებოდა უკვე მისი დავიწყება.

ცოლი - მგლოვიარე იყო დაქანცული,
მგლოვიარე დედა - ჩამწვარ სანთელს ჰგავდა,
მე ვუცქერდი უხმოდ და მტკიოდა სული, 
ყველა გვერდით ედგა,  ერთადერთის გარდა.

დღევანდელის მერე -  დღეა ხვალინდელი
და ცხოვრებაც წავა, როგორც ადრე იყო,
ახლით შეიცვლება ძველი სადარდელი.
 შენ - ცხოვრება დღეით უნდა ათარიღო!

უკანასკნელ გზაზე  სხვას ვინც  მიაცილებს,
გზას ეჩვევა.  ჭირი -  ნახავს  გასაცინებს!