ღალატის სონეტი

#ლექსები

ნინო დარბაისელი

ღალატის სონეტი

დაიღალა გული დარდის მოდებით,
არას  ვეძებ ცრემლის მოსაყვანად. 
შორებლისგან - ღალატს ნუ ელოდები,
საღალატოდ - ახლობლები გვყვანან.

ფიქრობ, მოვა ვინმე ცხრამთისიქიდან,
კარავს დასცემს,  შენთან თუკი დარჩა!
გამოსაქვითს ეძებ? -  გამოიქვითა,
გარეღალატს ეძებ,  გარე -  არ ჩანს!

რატომ ხდება?! მიზნები გაქვთ საერთო, 
დგება წამი,   გეგმა ებრძვის  მიზანს
და გიმეტებს, თუკი ბრძოლით გაერთო,
მერე გიკვირს,  ზოგი რას არ იზამს!

რა ქნა, როცა მათში არის მთავარი
მოღალატე -  თავი საკუთარი.