პალატინის სონეტი - მონორაიმი

ნინო დარბაისელი

პალატინის  სონეტი - მონორაიმი

(ვინც ხართ რომში ნამყოფი, ალბათ  იცით - პალატინის ბორცვია ერთ-ერთი პირველი,  რასაც ტურისტები ნახულობენ)

ბაცი მომწვანო პალატა და შენ - ბუნებით მორცხვი, 
მე -   სანახავად მოსული. პარკით -   ვაშლი და მოცვი.
 ტუმბო. ზედ  რაღაც სასმელი და ერთი ხელსახოცი.
 უაზრო სიტყვა : - შენზე წინ სხვებია   დასახოცი! 

 რა გვაცინებდა, აგვიტყდა ორივეს რა ხორხოცი!
- გახსოვს, რომში რომ დაგკარგე? იყო მაისის ოცი, 
მე - შენი მეხსიერებით  ერთხელაც განაოცი:
 ვამბობ:- ეგ რამ მოგაგონა,  წელია მთლად ორმოცი!

 ფეხით რამდენი ვიარეთ,  ფოტოა - წარუხოცი.
 ფულიც დაგიდე,  ძველი ვთქვი -  “მიციამ იცის მოცი! ”
ზედ მოვაყოლე გიშერი,  ტაძარში შენალოცი.
თქვი: - სიკვდილს  არ ენაღვლება შენი ნაცი და ქოცი!

მაინც, რა კარგად გადარჩი, საქმეა მოსალოცი! 
- ცალძუძუ  ვარო,  გამთხარეს, ვით  პალატინის ბორცვი!