კოლორადო

ნინო დარბაისელი

კოლორადო

კოლორადო,
კოლორადო,
ამ ბურუსში გზას ძლივს ვიკვლევთ ორ-ორადო,
ჰაიკერნი თავის გარდა, ვის ვჭირდებით!
ჩაფუთნულნი ერთმანეთს-ღა ვეჭიდებით,
კოლორადო ვის უქია?!
ამ ივნისის შუაგულში,
ყველგან - სიცხით დადაგულში,
აქ ისეთი
თოვლიანი ქარბუქია,
თოვლი ციდან კი არ მოდის, როგორც წესი,
(კვირობს ჩვენში თვით ჭაღარა, უხუცესი),
უნდა ქარბუქს,
ყველაფერი წამოხვეტოს,
ამ მისტიურ მწვერვალამდე აასვეტოს;
დაბლა, ჩვენთან არაფერი არ დატოვოს,
ცას - მიწიდან აათოვოს,
სადღაც, ნისლში დამალული ასპენია,
დაუფარავს თოვლის საფარს ასფენიანს.
გადამტყდარი, მოცახცახე - თეთრი ვერხვი,
მურა-წითელ კლდოვანებში - უფსკრულების დაფჩენილი ხახა - ვეფხვი.
ეს - ახლოდან, ნისლში - არც ჩანს არაფერი,
დასანახი, ან სათქმელად შესაფერი.
გაგვიჩუმდი, ნეტა, გამომყოლო რადო?!
(დაეცა და მგონი მუხლი აიტყავა,
ამ მთებს მიჯობს ერთი ჭიქა ცხელი ყავა)
შავ-თეთრი ხარ. შავად მოსჩანს მარადმწვანე,
გამოგვადგა დღე უმზეო, თანაც მწვავე,
გთვლიან მრავალ ფერად ანუ კოლორადო,
კოლორადო,
კოლორადო!

- - -
* ასპენი - საერთაშორისო კურორტი კოლორადოში, აშშ. (თარგმანში - ვერხვი)
თეთრტანიანი, მოცახცახე ან მოკანკალე, (ტრემბლინგ ასპენ) ვერხვის სახეობა - ფართოდაა გავრცელებული ჩვენშიც, მეტადრე დასავლეთ საქართველოში.