ცხრა ძმის რეტრო, (სარ-კასტური)

ნინო დარბაისელი
ცხრა ძმის რეტრო
(სარ-კასტული)


-დედი, მაგ შენს უბეში  ნეტა რა ნაყოფია?
- თხილის ერთი მარცვალი,  ცხრა ძმის გასაყოფია.
 
- თხილის გული -  უბეში რაღა შესანახია?
- რომ გადავცე, სუყველა ერთად დასანახია,
თავი ვერ მოვუყარე, ვიცი, დასაძრახია.

- არ ამძაღდეს ამდენხანს  უიმედო ტარებით!
 - ჰო,  დრო გადის ამდენი
 ხრიკების ჩატარებით,
ამაოდ ჩაბღუჯული დროშის მსხვილი  ტარებით,
 წრეში ჩაკეტილები  - უქმად დავეტარებით.

 -ერთი თხილი,  მითხარი, ცხრა ძმამ როგორ გაიყოს?
- როგორ?! -  ერთმა მათგანმა მსხვერპლი უნდა გაიღოს, 
ოღონდ რისკი იმისი  ვინმემ  უნდა აკურთხოს, 
როგორც ტატო იტყოდა, განა  ძმები “ა-კურ-თხოს”, 
მძაღე თხილი დაღეჭოს, დანარჩენს - შეაფურთხოს!

ჰოდა,  მიდის ფურთხება, 
წყევლა-კრულვა, კამათი…
დამნაშავე ვინაა?!
ვინ და… დედა  ამათი!