კროჭი

#ლექსები

(ჭ - ლოკ. თანხ.-ია. ენაში, არცთუ ფართოდ გამოყენებადი. მისით ბგერწერული თამაშები -  სახალისოა!)

ნინო დარბაისელი

კროჭი

(ეს პირველი შემთხვევაა, ცვლილება მაქვს ლექსში მყისი,
მთელი ტექსტი  დავასრულე, დავამატე დასაწყისი.

დედაჩემმა ლექსი ნახა, იქოქოლა, იწიწინა.
-დედი, კროჭი - სამკაულის ყუთს  გვირქვია პაწაწინას.)

თუშ-ფშაური,  დიალექტი - საგანძური არის ენის.
მშობლიური - თუკი გიღირს, უცხოს - ვინ რას შემოგტენის!

ზოგი  არის ნებიერი, მოქარგული უყვარს კროჭი,
დადის მორთულ-მოკაზმული, რა - სიბერე, რის - ნაოჭი!

გიყვარს სარჭი? გასარჭობი? მოსახვეჭი? მოსაბოჭი?! 
რომც იწვალო, ვერ დაიტევ,  თუ მოზრდილი არ აქვს კროჭი.

ზოგი კროჭში ბროჭს აურევს, შეცდომაა რამ საჭირე! 
კროჭი სხვაა, ბროჭი - სხვაა, ბროჭს - გულდაგულ მოუჭირე!

 ორკროჭობა - სხვას უძრახე. აჭყვიტინდი, როგორც გოჭი?
შეგშურდა თუ დაუწუნე?! - თუ მოგინდა კიდევ კროჭი?

ორკროჭობა -   განუკითხე, თითქოს მტერი გაგეკოჭა,
სხვას - ორობა  გაუკილე,  მერე  იყავ მრავალკროჭა!

მთლად უკროჭოს   რაღა უნდა?! - ეძებს ყელზე მოსაყროჭებს?
მოუხდება კარგი ჭოჭი, ალბათ ვინმეც დაუჭოჭებს!

მინდა ვუთხრა  კროჭიანებს, უჭოჭმანოდ შესაბოჭებს, 
ბროჭებს კარგად მოუჭირეთ, გაუფრთხილდით თანაც კროჭებს!