ბათუს სახელით

ბათუ დანელია 75 წლისა შესრულდა.
ამ თარიღს საქართველო  განსაკუთრებულად უნდა ხვდებოდეს. 
სულითა და გულით ვულოცავ და  როგორც ძველები იტყოდნენ, ლუკმა პურს, ჭიქა წყალს, კვნიტ მარილს, ჯანმრთელობასა  და სიცოცხლის ხალისს  ვუსურვებ მრავალჟამიერ!


ბათუ,  ეს რაღაც ფეისმა შემახსენა, სულ ცოტა, სამი წლის წინანდელი უნდა იყოს. არ ვიცი, მაშინ თუ დავამუშავე და დავდე, რანაირი იყო. ყოველი შემთხვევისთვის ვდებ.

ნინო დარბაისელი

ბათუს სახელით

    (ბათუ დანელიას, რომელმაც მთხოვა, მანდ,   ამერიკაში ირემს ჩემი სახელით მოეფერეო)

ირემო, ყელმოღერებულო, 
ნათიბში  ნდობით მოწოლილო,
დობილო, ჩემზე მონდობილო, 
ბათუს სახელით გეფერები.

აქ მო, მე მომადე  თბილი, სახე,
სხეული - მკვრივი,  მოცახცახე, 
არ შეკრთი, უცებ რომ დამინახე?
ბათუს სახელით გეფერები.

მშვიდად რად მომანდე შენი  ფერდი
ან ასე რატომ  გამიჩერდი?
შვილებს ააფარე ალბათ მკერდი.
ბათუს სახელით გეფერები!

იქნებ დაგედევნა რამე მხეცი,
მხეცს ჩემთან თუ გამოექეცი,
არ გავნებ, სწორად მოიქეცი…
ბათუს სახელით გეფერები!

ყვავილები გვირგვინებს ელევიან,
თავზე კი პეპლები ევლებიან,
აქედან ტყისპირამდე - ველებია.
ბათუს სახელით გეფერები!

ბალახებს შენი სუნი თავბრუს ახვევს, 
იქნებ ხიფათს რასმე შეეჩეხე,
სირბილში  ფეხი მოიტეხე?
ბათუს სახელით გეფერები!

ირგვლივ -  სულ ხორბალია ანდა ქერი,
წყლიანი თვალებით შემომცქერი,
მიფრთხი და თან მორჩილად შემომცქერი,
ვიცი, რად გარბიან შენფერები.
ხომ ხედავ, მხოლოდ გეფერები,
ბათუს სახელით გეფერები,
გეფერები!