ცალკუთხა ღიმილი

#ლექსები

ნინო დარბაისელი

ცალკუთხა ღიმილი

 ვთვლიდი, ცალკუთხა ღიმილი - 
სჩვევია ფლიდს და  მპარავს,
თავისი ავის მფარავიც   ეფარვის ამა კარავს,  
ობოლი ვნახე დავრწმუნდი, აქამდე მიმიქარავს, 
ნიღაბი  - ირონიული - მტკივნეულ სახეს ფარავს.

განსაცდელს შესჭიდებია ვინაც სრულიად მარტო,
ვინც იცის, მოვა არავინ, როცა ნამდვილად გიჭირს, 
როდესაც  ნაღალატევი -  ბალიშს ცრემლებით ალტობ,
დამცინავ ნიღაბს მიაგნო, ამასაც უნდა ნიჭი.

კეთილია  თუ  ავგული,  იქნებ  - ორივეც ერთად? 
მიდი, სცადე  და გაიგე, ვინ რას იფარავს როდის!
  მასკარადია ზრახვათა  და რია-რია ფერთა…
რკვევაში გადის ცხოვრება,   არც უკეთესი მოდის!