კაშხალი და კოხშინშხალი

#ლექსები

ნინო დარბაისელი

კაშხალი და  კოხშინშხალი

(ციკლიდან - ეტიუდები)

კაცის ხელი  - ქალის ხალი,
სიყვარული - ნარისხალი.
დაგავიწყდა? - ხარ ის ქალი.
ბედის დანახარისხალი.

გახსოვს  - ძველი ის კაშხალი
და კაშხალთან - ქარიშხალი?
არ ეკმარა  ის ჩინჩხალი, 
წამოვიდა კოხშინშხალი.

კაცის - ხელი, ქალის - ხალი.
სიყვარული - ნარისხალი.

— - - 

* კოხშინშხალი -  მინდოდა, ლექსში ,, გადამერჩინა”  ეს კარგი ქართული  სიტყვა. 
 ნიშნავს ზამთრის ქარიშხალს, თან ყინულებს რომ გაყრის, ძვალში რომ ატანს.
** ჩინჩხალი - შემომხვდა, შემომანათა, ჩინჩხლები შემომაყარა   (ლ. ასათიანი. “ყაყაჩო”) 

ძველად აქ ჯარებს უხმობდნენ
დაფდაფითა და ბუკითა,
ახლა ყაყაჩო შემომხვდა
ლამაზი ქალის შუქითა.
შემომხვდა, შემომანათა,
ჩინჩხლები შემომაყარა,
ალუჩა-ტყემლის შემოსვლა
და გაზაფხული მახარა…
…ანუ ნაპერწკლები შემომაყარაო.
ჩინჩხალი - დასტურდება ალ. ჭინჭარაულის ,,ვაჟას მცირე ლექსიკონშიც” და ნიშნავს ცეცხლის ნაპერწკალს.
ჩემი ფიქრით, არაა გამორიცხული, ეტიმოლოგიურად ქარიშხალი ,, ქარჩინჩხალს” უკავშირდებოდეს, მისი ამპლიფირებული ანუ გაძლიერებული ვარიაციაა კოხშინინშხალიც  (ანუ კოხ-ჩინჩხალი) სადაც კოხი -  ქვას, სეტყვას ნიშნავს.