მწარე შვილები

#ლექსები

ნინო დარბაისელი

 მწარე შვილები

საცაა, გული გაგისკდება, 
ვიღაცის  წასვლით ანდა მოსვლით,
რაიმე შიშით, 
სიმამაცით,
უბედურებით,
ბედნიერებით,
ომით,
მშვიდობით…
სულერთი არის, 
გამსკდარი გული - გამსკდარია.

განა  ცოტაა გულგასატეხიც, 
ზოგჯერ მიზეზი არ დაგჭირდება. 
ამის მერეა, რომ  თუ გადარჩი,
გაგისქელდება ნაწიბურები, 
გიფეთქავს გული ზომიერად, 
ცოცხალი ხარ და შეგეხედება, 
სამაგიეროდ, 
გულგრილი და
გულცივიც გახდი.

ყველა გულცივი - ადრე, წარსულში,  
მოსიყვარულე-გულ-გამტყდარია,
რომელსაც ყოფამ  უსამართლო ხელი დარია,
ყველა გულცივი - 
გადარჩენილი ცოცხალ-მკვდარია,
ყველა გულცივი - ახლა უკვე შეუმცდარია.

დაბადებით კი
ყველა - შეცდომის შვილები ვართ,
სულ ახალ-ახალ შეცდომებზე დაგეშილები, 
ჩვენ ვართ შვილები.
წელშეზნექითა და დიდი მუცლის გამობზეკით დამტარებელთა გაჩენილები
თუ  მწველ ზაფხულში საწვიმარქვეშ ცხრათვიანი მუცლის მფარავთა - 
ერთად გვირგვინქვეშ შეუსვლელთა,
შაბათისა თუ  ამომსკდარი ვნების ნაყოფნი,
ჩვენ ვართ შვილები!
ჩვენ ვართ შვილები და რახანია,
აღარ გვესმის სხვების კვნესა და ჩივილები.

 ჩვენ ვართ შვილები  - დაულოცავად დარჩენილები
თუ ხმამაღლა  დალოცვილები,
ქვეყნად  ყველაფერს და არაფერს ვემორჩილებით არ-გულჩვილები,
გულგრილები,
ჩვენ ვართ შვილები!