0 132

ყინულის დედოფლის დაბრუნება


ფიფქის ღმერთებო, თეთრო მწერებო,
რომ ამოავსეთ ჩემი ჰაერი,
რომ დამასიეთ ქარის მწევრები
და ლოლუები ათასნაირი,

რომ დამიწინწკლეთ, გამომიძენძეთ
მოსასხამები ფართხუნა ჩრდილის,
ყვრიმალებზე რომ გამომიძერწეთ
სხვა ყვრიმალები – ყინულის ცვილით,

რომ მომაცილეთ ძვირფასი ბაგე -
ჩემი სახელით ჰაერს რომ ორთქლავს,
ჩამომაშორეთ გრძნობების ბარგი
და ბარათების უმიზნო მოთქმა,

რომ გამიბრწყინეთ ნახშირი – კვნიტად –
ყინულის – თვალში; გულის – ორივე –
გასაღებიც და პაწია კლიტეც –
ხელუკუღმა რომ მომასროლინეთ, -

კიდევ, რას ითხოვთ? ზამთრის სარკმლებსაც -
შევეგუები მშვიდად; გულადად -
ვიტოვებ მხოლოდ – წიგნებს და სარკეს,
მზესაც ველევი – სიყვარულამდე.
კომენტარები (0)